Որդին մորից գողացել է «Զազո», «Զոզո» այծերն ու «Զազո», «Զոզո», «Զիզո» ոչխարներին. Արտակարգ դեպք` Գեղարքունիքի մարզում

Ոստիկանության Վարդենիսի բաժնի հետաքննական բաժանմունքի ավագ հետաքննիչ Գասպարյանի կողմից նյութեր են նախապատրաստվում հունիսի 29-ին ոստիկանության Վարդենիսի բաժին դիմած Դարանակ գյուղի բնակիչ, 74-ամյա Նորվարդ Հ.-ի ահազանգի փաստով:

Ինչպես հայտնում է ֆոտոլրագրող Գագիկ Շամշյանը, վերջինս ոստիկանություն ահազանգել և հայտնել է, որ հունիսի 28-ի գիշերը իր որդին, առանց իր գիտության, իրենց անասնագոմի դռան կողպեքը բացելու միջոցով ներս է մտել և այնտեղից գողացել 2 գլուխ այծ, 3 գլուխ ոչխար և 3 գլուխ գառ:

Դեպքի վայր ժամանած ոստիկաններին Նորվարդ Հ.-ն հայտնել է, որ իրեն պատճառվել է մոտ 300 հազար դրամի վնաս: Տուժողը մանրամասնել է, որ այծերից մեկի անունը «Զազո» է եղել, մեկինը՝ «Զոզո», 3 ոչխարներից մեկը նույնպես եղել է «Զազո» մյուսները՝ «Զոզո» և «Զիզո», իսկ գողացված 3 գյուխ գառներին անուն դեռ չէր դրել, ասելով, որ չի հասցրել:

Ոստիկանությունը պարզում է դեպքի հանգամանքները: Գ. Շամշյանի տեղեկություններով՝ տուժածը հայտնել է նաև, որ ինքը աշխատում է Դարանակ-Փամբակ գյուղերի միջև դպրոցների դասվար: