English
Русский
Այսօր՝ մարտի 12-ին, ողբերգական դեպք է տեղի ունեցել Երևանում։ Ժամը 13:00-ի սահմաններում ՀՀ Ներքին գործերի նախարարության ոստիկանության Երևան քաղաքի վարչության քրեական հետախուզության բաժնում և ոստիկանության Արաբկիրի բաժնում օպերատիվ տեղեկություններ են ստացվել, որ Մամիկոնյանց փողոցում գործող Երևանի ինֆորմատիկայի պետական քոլեջի մոտ վիճաբանություն է տեղի ունեցել, և կա դանակահարված երիտասարդ։
Կարճ ժամանակ անց հիվանդանոցից ահազանգ է ստացվել ոստիկանության Արաբկիրի բաժին, որ նշված վայրից իրենց մոտ տեղափոխված տղան, գիտակցության չգալով, մահացել է։
Oragir.News-ը եղել է դեպքի վայրում, զրուցել հաստատության աշխատակիցների, ինչպես նաև հարակից շենքի բնակիչների հետ, որոնք ականատես են եղել ողբերգական դեպքին։
Երևանի ինֆորմատիկայի պետական քոլեջի աշխատակիցը թույլ չտվեց մուտք գործել հաստատության տարածք՝ պատճառաբանելով, որ քննչական գործողություններ են կատարվում, ուսանողների են հարցաքննում։
Հաստատության մի քանի աշխատակիցներ էլ շենքից դուրս գալով հրաժարվեցին որևէ հարցի պատասխանել, ապա հորդորեցին, որ ուսանողները ևս որևէ հարցի չպատասխանեն։
Երևանի ինֆորմատիկայի պետական քոլեջի հարևանությամբ գտնվող Մամիկոնյանց 54 շենքի բնակիչներից մի կին Oragir.News-ի հետ զրույցում ասաց, որ դեպքը տեղի է ունեցել իրենց շենքի բակում։
«Աղմուկը լսեցինք, դուրս եկանք, ու այդ երիտասարդը ասֆալտի վրա էր, ջուր էին լցրել վրան, կրծքավանդակի արյունը ավելի էր տարածվել, մարդիկ բղավում էին, շտապօգնությունը եկավ 1 րոպե անց ու պատգարակով տեղափոխեցին։ Ես տեսա, որ մի երեխա երիտասարդի պարանոցի հատվածն էր պահել։
Տղայի կրծքավանդակը ամբողջությամբ ջրի ու արյան մեջ էր, երեխան անշարժ էր, ու ինձ թվաց, որ կարծես՝ սիրտն էին վնասել։ Լսել ենք, որ հարվածողը ուսանող չի եղել»,- ասաց բնակիչը։
Շենքի բնակիչներից մեկ ուրիշն էլ հայտնեց, որ ամբոխ է հավաքվել, հարվածներ են հասցրել մեկին։ Միջադեպի ժամանակ նույնիսկ իր տղայի մեքենան է արյունոտվել։
Քոլեջի աշխատակիցները մեզ ասացին, որ դանակահարվածը քոլեջի ուսանող էր, նրան ծեծողները 10 հոգուց ավելի են եղել, բայց ոչ ոք չգիտի, թե որն է եղել սպանության պատճառը։ Տարբեր վարկածներ կան, որոնցից ոչ մեկ դեռ չի հաստատվել։
Մանրամասները՝ տեսանյութում։
