Թեև մարդկության պատմության մեջ գրիպի ամենամեծ համավարակներից մեկից՝ Իսպանական գրիպից անցել է մեկ դար, սակայն զուգահեռներ կարելի է տանել մարդկության` Իսպանական գրիպի և կորոնավիրուսի դեմ պատասխան արձագանքների միջև, գրում է Daily Mail-ը։
Ինչպես 1918 թվականի Իսպանական գրիպի ժամանակ, կորոնավիրուսի համավարակի օրերին նույնպես դիմակները և թոքերի արհեստական օդափոխության սարքերը կենսական նշանակություն ունեն։
Թեև մերօրյա դիմակներն ու թոքերի արհեստական օդափոխության սարքերն ի տարբերություն 20-րդ դարի դիմակների և սարքերի ավելի ժամանակակից և կատարելագործված են, սակայն երկու համավարակների դեպքում էլ դրանք կենսական նշանակություն են ունեցել։
Ստորև ներկայացված լուսանկարները կյանքի են կոչվել MyHeritage-ի առցանց կայքի կողմից, որը սևուսպիտակ լուսանկարները վերածել է գունավոր լուսանկարների։
Իսպանական գրիպը եղել է մարդկության պատմության մեջ գրիպի ամենամեծ համաճարակներից մեկը։ 1918 թվականի հունվարից մինչև 1920 թվականի դեկտեմբեր շարունակված այս գրիպն ամբողջ աշխարհում վարակել է 500 միլիոն մարդու՝ ներառելով հեռավոր խաղաղօվկիանոսյան կղզիները և Արկտիկան, սպանել 50-100 միլիոն մարդու, որը կազմում էր աշխարհի բնակչության 5 տոկոսը։ Այն դարձել է մարդկության պատմության ընթացքում տեղի ունեցած ամենամահացու բնական աղետներից մեկը։
Առաջին համաշխարհային պատերազմի ոգին պահպանելու նպատակով, հիվանդության և մահացության դեպքերի հրապարակումը նվազեցվել է Գերմանիայում, Բրիտանիայում, Ֆրանսիայում և Միացյալ Նահանգներում, բայց Իսպանիայում թերթերն ազատորեն փաստում էին մահացությունների մասին։ Այդ իսկ պատճառով սխալ պատկերացում էր ստեղծվել, թե Իսպանիան ամենատուժած երկիրն է, և հիվանդությունն անվանվել է Իսպանական գրիպ։