Բժիշկ Ռիտու Սալուջա-Շարման թվարկել է վեց հիմնական ամենօրյա սովորությունները, որոնք «սպանում են» իմունային համակարգը: Նրա խոսքերը մեջբերում է Eat This, Not That! հրատարակությունը:
Հիմնական սովորություններից մեկը, որը լրջորեն թուլացնում է իմունային համակարգը, բժիշկն անվանել է քնի քրոնիկ պակասը։ Քունը կարևոր է իմունային համակարգի օպտիմալ գործունեության համար, ուստի կենսականորեն անհրաժեշտ է գիշերը առնվազն յոթից ութ ժամ քնել:
Հիվանդություններին և վարակներին դիմակայելու օրգանիզմի կարողության վրա ուղղակիորեն ազդում է ծանր սթրեսը: Նյարդային լարվածությունը բարձրացնում է արյան մեջ կորտիզոլի մակարդակը, ինչը ժամանակի ընթացքում կարող է հանգեցնել բորբոքային պրոցեսների և թուլացնել իմունային համակարգը։ Սալուջա-Շարման խորհուրդ է տվել ամենօրյա ռեժիմում ներառել յոգան և մեդիտացիան, որոնք ուղղված են սթրեսի նվազեցմանը և դրա նկատմամբ օրգանիզմի ֆիզիոլոգիական ռեակցիաների կառավարմանը:
Բժիշկը իմունիտետը «սպանող» սովորությունների թվում նշել է նաև ծխելը և շատ ալկոհոլ օգտագործելը: Երկու վատ սովորություններն էլ օրգանիզմն ավելի զգայուն են դարձնում վարակների նկատմամբ և մեծացնում քաղցկեղի վտանգը: Բացի այդ, ծխելը կարող է հրահրել ռևմատոիդ արթրիտի զարգացում, իսկ ալկոհոլը բացասաբար է անդրադառնում աղիքային միկրոֆլորայի վրա, որն անմիջականորեն կապված է իմունիտետի հետ։
Իմունային համակարգի վրա բացասաբար է ազդում նաև նստակյաց կենսակերպը, ինչը հանգեցնում է ավելորդ քաշի և քրոնիկ հիվանդությունների սրացման։ Մասնագետը խորհուրդ է տվել չանտեսել չափավոր ֆիզիկական ակտիվությունը, քանի որ դա դրականորեն կազդի առողջության վրա։
Եզրափակելով՝ մասնագետը խորհուրդ է տվել, որ սննդակարգը լինի բազմազան և հավասարակշռված: Բժիշկը հիշեցրել է, որ պետք է օրական առնվազն հինգ չափաբաժին բանջարեղեն և մրգեր ուտել՝ օրգանիզմին անհրաժեշտ քանակությամբ վիտամիններով, հանքանյութերով, ֆիտոնուտրիենտներով, բջջանյութով և հակաօքսիդանտներով ապահովելու համար։