Արցախն ինձ համար հայրենիք է, իսկ հայրենքիս համար պատրաստ եմ կյանքս զոհաբերել․ Հովիկ Աղազարյան

Ազգային ժողովի «Քաղաքացիական պայմանագիր» խմբակցության պատգամավոր Հովիկ Աղազարյանը, երեկ հայտարարել էր, որ իր համար անհասկանելի է, թե ինչու ենք մենք ցավագին ընդունում Արցախն Ադրբեջանի կազմում ճանաչելը։

Oragir.News-ն այսօր ՔՊ ական պատգամավորից հետաքրքրվեց, թե այս հայտարարությունից մեկ օր անց արդյո՞ք հասկացել է այդ հարցի պատասխանը, թե ոչ։ «Ես ասել եմ հետևյալը, եթե մենք ճանաչում ենք Ադրբեջանի տարածքային ամբողջականությունը 91 թվականի Ալմաթայի հռչակագրի հիմքի վրա, նշանակում է, որ մենք ճանաչում ենք Արցախն Ադրբեջանի կազմի մեջ։

Ես չեմ ասում հայրենիքի կորուստը ցավ չէ»,- ասաց Աղազարյանը։ Հարցին՝ Արցախը իր հայրենիքը համարո՞ւմ է, թե ոչ, պատգամավորը պատասխանեց․ «Այո Արցախն ինձ համար հայրենիք է»։

Ճշտող հարցին՝ մայիսին Նիկոլ Փաշինյանը հայտարարել էր, որ Հայաստանը պատրաստ է ճանաչել Ադրբեջանի 86․600 քառակուսի կմ տարածքային ամբողջականությունը, որի մեջ ներառված են նաև Լեռնային Ղարաբաղը և այսպես կոչված անկլավները՝ Տիգրանաշենը, Տավուշի գյուղերը։ Գրանադայում նա հռչակագիր ստորագրեց, որով վերահաստատեց, որ Հայաստանը հավատարիմ է մնում վերը նշված հայտարարությանը, սա նշանակում է, որ Փաշինյանը արդեն իսկ հանձնե՞ց անկլավները, Աղազարյանը պատասխանեց․

«Անկլավների հարցը սիմետրիկ հարց է, մոտավորապես ինչքան տարածք կա մեզ մոտ, այնքան տարածք էլ կա Ադրբեջանի մոտ։ Ես անձամբ գտնում եմ, որ նպատակահարմար չէ անկլավները փոխանակել։ Անկլավների հարցը կճշտվի սահմանազատման և սահմանագծման գործընթացի ժամանակ»։

Հարցին՝ եթե Արցախը համարում եք Ձեր հայրենիքը, պատրաս՞տ եք ազատագրել այն, Աղազարյանը պատասխանեց․ «Շատ բարդ հարց եք տալիս։

Ես միշտ եմ պատրաստ եղել կռվել, բայց միշտ մտածել եմ, որ որոշում կայացնողը պետք է լինի Արցախի ժողովրդի կողմից ընտրված օրինական իշխանությունը, որովհետև ես ինքս ապրելով Երևանում, ինչ-որ իմաստով ապահով, չեմ կարող խորանալ այն ապրումների և սարսափելի իրողությունների մեջ, որը ապրել են շատ մարդիկ, որոնց ես սիրում եմ, մեծամասնությանը պաշտում եմ, որպես իմ ժողովուրդ։ Իմ համար ցավ է, որ Բակո Սահակյանն այսօր Ադրբեջանում է։

Այնպես որ Արցախն ազատագրելու վերաբերյալ հարցին դժվարանում եմ պատասխանել, դա բոլորովին այլ հարց է։

Ես իմ հայրենիքի համար պատրաստ եմ կյանքս զոհաբերել, բայց կոնկրետության մեջ պետք է շատ լուրջ մտածենք և պատասխան տանք, առավել ևս, որ ես պատգամավոր եմ»։