Լիսկան Ֆրանսիայում հանձնվել է ճամբար

«Առաջին լրատվական»-ի զրուցակիցն է գործարար Սիլվա Համբարձումյանը։

– Տիկին Համբարձումյան, Ձեր՝ մի շարք դատական գործերով անցնող դատական գործերից ի՞նչ նորություններ կան:

– Առանձնապես նորություններ չունենք, սպասում ենք հունիսի 29-ին դատախազի տեղակալի ընտրությանը, որը զբաղվելու է ապօրինի ծագման գույքի բռնագանձմամբ: Իմ գործը միակն է, որ պատրաստ է: Երբ կառույցը ստեղծվի, երևի առաջին գործը իմը կլինի, որ կմտնեն բռնագանձում տարածելու:

Նաև հուլիսի սկզբին Արաքս Դիլանյանի և Վիկտոր Մարտիրոսյանի մասով առանձնացված գործն է քննվելու Վերաքննիչ դատարանում:

– Սամվել Մայրապետյանի հետ կապված նորություն կա՞:

– Ոչ, Մայրապետյանի հետ կապված ոչ մի նորություն չկա: Գիտեմ, որ չի վերադարձել: Նաև նրա նկատմամբ նոր մեղադրանքներ են ավելացվել, որի մասին իմացա մամուլից:

– ՀՔԾ-ն հայտարարություն էր տարածել, որ Մայրապետյանի կողմից ավելի քան 5 մլրդ դրամ հարկեր չվճարելու գործընթաց է տեղի ունեցել:

– Միշտ էլ այդպես է եղել, նմանատիպ մարդիկ ոչ մեկն էլ հարկեր չեն վճարել, դրա համար էլ մարդիկ, որոնք ոչինչ չեն ունեցել, միանգամից ունեցան ամեն ինչ:

– Արամ Հարությունյանի, Վարդան Այվազյանի հետ կապված նույնպես նորություն չկա՞:

– Ոչ մի նորություն չունեմ, Լիսկայից էլ այնքան նորություն ունեմ, որ Ֆրանսիայում հանձնվել է ճամբար: Մի տղան էստեղ է, մնացածը՝ այնտեղ միասին են:

– Այսքան տարի անց ի՞նչ հույսեր կան դատարանից:

– Դատարանից հույսերն այն են, որ նոր կառույցը, որ ստեղծվում է, դրանից հետո դատախազը պետք է մտնի դատարան՝ բռնագանձում պահանջելու: Սա օրինական գործ է, և դատավորները չեն կարող այլ որոշում կայացնել, որովհետև բոլոր փաստերը կան:

Եթե չեմ սխալվում, դեռ 2018 թվականին էր, որ ես ասացի, որ դատական համակարգը պետք է փոխվի, որ կարողանանք առաջ գնալ: Ես ասել եմ, որ եթե դատական համակարգը չփոխվի, զարգացում չի լինի, ներդրումներ չեն լինի: Ես հիմա էլ եմ պնդում, որովհետև եթե դատավորները նախկինում X գումար պետք է վերցնեին, հիմա X+Y են վերցնում, որովհետև մտածում են, որ իրենք, միևնույն է, չեն լինելու, կարող է այս փոփոխությունների արդյունքում իրենք չմնան, հեռանան։ Դրա համար էլ իրենք իրենց առաջարկվող գումարները վերցնում են ավելի թանկ կաշառքով։

– Դուք դրա մասին լսե՞լ եք, կամ, օրինակ, Ձեզ առաջարկվե՞լ է կաշառք տալ, ինչո՞ւ եք այդքան վստահ:

– Դատական համակարգին այնքան լավ ծանոթ եմ։ Ես կարող եմ նաև ցուցակը տալ հայտնի կաշառակեր դատավորների անուններով:

– Իսկ իշխանության քայլերը ինչպե՞ս եք գնահատում, դատական բարեփոխումների գործընթացը որքանո՞վ է ուշացած։

– Ես կարծում էի, որ Սահմանադրական դատարանի հետ կապված փոփոխությունները պետք է շատ ավելի վաղուց անեին, ուշացրին։ Հիմա էլ ուշացնում են դատական համակարգի փոփոխությունները։ Ես կարծում եմ՝ այդ 240 դատավորների մեջ կան բարեխիղճ դատավորներ նույնպես։ Չի կարելի բոլորին նույն արշինով չափել։ Եվ ես նաև պատրաստ եմ, ցուցակ ունեմ հայտնի կաշառակերների։ Կարծում եմ՝ մի օր կհրապարակենք այդ ցուցակը միասին։ Երեք դատավորի վրա անգամ արդարադատության նախարարություն եմ բողոքել՝ Ալիկ Սուքոյան, Արթուր Մկրտչյան և Տարոն Նազարյան։ Ես բողոքել եմ արդարադատության նախարարությանը անօրինական վճիռներ կայացնելու համար, հիմա սպասում ենք, թե Վճռաբեկ դատարանը ինչ կանի: Ցավն այն է, որ երբ մի դատավորի համար բողոք ենք տանում արդարադատության նախարարություն, սպասում են, որ այդ դատավորի վճիռը երեք ատյանով անցնի, նոր արդարադատության նախարարությունը քննարկի այդ հարցը։ Ես կարծում եմ, որ օրենքի փոփոխություն նաև պետք է լինի, որ հենց առաջին ատյանից հետո, եթե կա որևէ բողոք, պետք է անմիջապես դատավորի վճիռը դնեն, նայեն, քննարկեն: