English
Русский
Ես որոշ ժամանակ արտագնա աշխատանքի եմ գնացել, այստեղ՝ «Յանդեքս» տաքսի, ծառայությունում մեքենա էի վարում, օրավարձով վերցրած մեքենա, որն այլևս ձեռնտու չէր, էլ չեմ անում. այս մասին Tert.am-ի հետ զրույցում ասաց Գյումրիից Գևորգ Կուրղինյանը՝ անդրադառնալով վարչապետի հայտարարությանը, թե Հայաստանում օրավարձով աշխտող հասկացություն գոյություն չունի:
«Շատ հայ տղամարդիկ արտագնա աշխատանքով են գումար աշխատել, բացի դրանից, գալով այստեղ՝ փորձել են ինչ-որ փոքր աշխատանքով մի փոքր գումար վաստակել իրենց օրվա հացի համար, ունեն բանկային պարտավորություններ, ունեն պարտքեր խանութներում և այլն: Օր-օրի օրական աշխատելով մարդիկ վաստակել են իրենց գումարը:
Բայց հիմա արտագնա աշխատանքը դադարեց, դադարեց նաև այդ մանր-մունր աշխատանքների կատարումը և մարդիկ գումար չեն վաստակում: Այստեղ խնդիր է դառնում բանկերի նկատմամբ ունեցած պարտավորություն կատարելը, կոմունալ վճարումներ կատարելը: Բոլոր վարձու աշխատողները, որոնք մանր գումարներ են վաստակել, ունեն այդ խնդիրները»,- նշեց նա:
Գևորգ Կուրղինյանը նշեց, թե պետությունից ակնկալում է, որ այդպիսի աշխատողներին որոշ չափով այս ընթացքում օգնեն: «Օգնեն, որ մարդիկ կարողանան հացի խնդիրը լուծել: Վարկային պարտավորությունները հետաձգեցին մեկ ամիս, կոմունալը տեսնենք ինչ է անելու, բայց եթե հանկարծ այս ամենը երկար տևեց այդ դեպքում շատ մեծ խնդիր է լինելու: Հիմա այս պահին դեռ մարդիկ կարող են ապրել ունեցած գումարով, բայց եթե ձգվեց 4 ամիս, չգիտեմ ինչ կլինի»,- նշեց նա:
Ինչ վերաբերում է վարչապետի հայտարարությանը, թե օրավարձով աշխատող չկա, կա ստվերում գործող, Գևորգ Կուրղինյանն ասաց, որ օրինակ՝ «Յանդեքսը» հարկ վճարում է, վարորդներն էլ այդ գումարները վճարում էին տերմինալով. «Դա պետությունից պահե՞լ է: Պետությունը չի արգելել տրանսպորտի շարժը, բայց մարդիկ չեն օգտվում ծառայություններից կամ օգտվում են շատ քիչ, որը եկամուտ չի բերում»:
Ինչ վերաբերում է անհատ տաքսի վարորդներին, որոնք հիմա խնդրի առաջ են կանգնել, նա ասաց, որ խնդիրը շատերի մոտ կա: «Ես ինքս Գյումրիից եմ, Գյումրիում շատ ծանր է վիճակը: Մենք ակնկալում էինք, որ Գյումրիում տուրիստական շարժ է լինելու, շատ ուրախ էինք դրա համար, բայց այդ ամեն ինչը դադարեց ու այդ մարդիկ խնդիր են ունենալու»,-շեշտեց նա:
Ինչ վերաբերում է ընդդիմադիրների առաջարկներին, որ օրավարձով աշխատողներին օրինակ 70,000 դրամով օգնեն, նա նշեց, որ դա շատ լավ կլինի: «Այդտեղ էլ խնդիրներ կլինեն: Ինչպե՞ս են պարզելու այդ մարդը օրավարձով աշխատո՞ղ է եղել, թե՞ ոչ: Հիմա ցանկացած մեկը կարող է գնալ, ասել՝ ես օրավարձով աշխատող եմ եղել»,-ասաց նա և հավելեց, որ ուրիշ երկրներում մարդիկ ցանկացած ընտանիքի տվեցին ինչ-որ գումար, որ մարդիկ կարողանան տանը փակվելով իրենց հացի խնդիրը լուծել, ոչ թե ասել՝ սա վարձու աշխատող է, սա պետության աշխատող է:
«Հիմա կային աշխատողներ, ովքեր աշխատում էին ռեստորաններում, կարի արտադրամասերում, նրանք էլ չեն աշխատում, նրանց վճարելու է կա՛մ պետությունը, կա՛մ իրենց ղեկավարները, իսկ ովքեր չեն աշխատել, դրանց էլ պետության կողմից ինչ-որ աջակցություն պետք է լինի, այդ խնդիրը կա, պետք է կարողանան այդ ամեն ինչը իրենց ուժերով, հնարավորություններով լուծել»,- շեշտեց Գևորգ Կուրղինյանը:
Վերջում նա հավելեց, որ այս պահի դրությամբ պետությունն ինչ-որ փորձեր կատարում է մարդկանց վիճակը լավացնելու. «Ինչ-որ տեղ էլ մենք ենք մեր երկրի համար ուզում ինչ-որ բան արած լինել, որովհետև մեր երկիրն այն երկիրը չէ, որ կարողանա այս ճգնաժամից առանց ցնցումների դուրս գալ: Մենք էլ ենք նեղություն կրելու, գործատուներն էլ, ուղղակի ուզում եմ, որ ոչ մեկ ոչ ոքի չնեղացնի ու պատվով դուրս գանք այս վիճակց»,- եզրափակեց նա:
