Ինչո՞ւ են իտալացիներն ավելի խոցելի կորոնավիրուսի նկատմամբ

Գենոմի առանձնահատկությունների պատճառով կորոնավիրուսը, հնարավոր է, որ փոխգործակցում է իտալացիների բջիջների հետ ոչ այնպես, ինչպես այլ երկրների բնակիչների բջիջների հետ: Այս մասին ասվում է նոր նյութում, որը հրապարակվել է medRxiv գիտական էլեկտրոնային գրադարանում:

Ինչպես հայտնում է ՏԱՍՍ-ը, կորոնավիրուսի տարածման արագությունն ու ախտանիշների բարդությունը կապված են մարդկանց մոտ ACE2 գենի որոշակի տարբերակների գերակշռմամբ կամ բացակայությամբ: Գիտնականներին հաջողվել է բացահայտել ACE2 գենի 3 տարափոխումներ, որոնք հաճախ են հանդիպում իտալացիների եւ եվրոպական այլ ազգերի մոտ, սակայն բացակայում են ասիական երկրների բնակիչների մոտ: Եվ գենի հենց այդ տարբերակներն են ազդում բջիջների եւ վիրուսի փոխգործակցության բնույթի վրա:

Գիտնականները Իտալիայի բնակիչների 7000 գենոմների անալիզ են անցկացրել եւ առանձնացրել այդ գենի առավել հաճախ հանդիպող տարբերակները:

Պարզվել է, որ իտալացիների մոտ  առավել հաճախ հանդիպում է տարբերակներից մեկը՝ p.Asn720Asp, ինչպես նաեւ կորոնավիրուսի հետ փոխգործակցության 3 հազվադեպ հանդիպող մուտացիաներ: Եվ հնարավոր է, որ հենց դա կարող է բացատրել, թե ինչու է Իտալիայում կորոնավիրուսից մահացությունն այդքան բարձր, նույնիսկ նրանց մոտ, ովքեր ռիսկային խմբում չեն: