Լեզվի պետական կոմիտեի նախագահ Դավիթ Գյուրջինյանը հորդորում է պետական կառավարման և տեղական ինքնակառավարման մարմիններին ընթացք չտալ և անտեսել այն քաղաքացիների էլեկտրոնային նամակները, որոնք գրում են լատինատառ, ռուսատառ, խառնատառ հայերենով:
Այս մասին Գյուրջինյանն ասաց «Արմենպրես» պետական լրատվական գործակալության տնօրեն Արամ Անանյանի հետ տեսակապով զրույցի ընթացքում:
«Համավարակը մի շատ վտանգավոր բան բացահայտեց: Եթե առաջ հանրային (սոցիալական) ցանցերում տեսնում էինք լատինատառ, ռուսատառ կամ խառնատառ գրություններ և մարդկանց հորդորում էինք անցնել հայատառի, փորձում էինք անտեսել այդ գրառումները, և դա անձնական դաշտում էր, ապա հիմա ահավոր մի բան է նկատվում: Այդ մասին լեզվի կոմիտեն հատուկ կոչ ուղղեց պետական կառավարման և տեղական ինքնակառավարման մարմիններին, ինչո՞ւ, որովհետև այս շրջանում, երբ քաղաքացիների հետ հաղորդակցումը հիմնականում առցանց եղանակներով է՝ էլեկտորնային նամականեր և այլն, նկատվեց, որ լատինատառ, ռուսատառ, խառնատառ գրությունների հեղեղ է: Նման նամակներ են ուղարկվում պետական մարմիններին, և մենք կոչ արեցինք, որ պետական կառավարման և տեղական ինքնակառավարման մարմիններն ընթացք չտան և անտեսեն այդ գրությունները, այլապես խայտառակ մի բան կլինի»,-շեշտեց Գյուրջինյանը:
Նա հիշեցրեց, որ մենք ունենք սահմանադրություն, լեզվի մասին օրենք. հայերենը պատկերացնում ենք միայն և միայն մեսրոպատառ, և մենք մեր պետությունում տեսնում ենք, որ ՀՀ քաղաքացիներն անպատասխանատու քայլեր են անում, որն անհարգալից վերաբերմունք է հայոց լեզվի նկատմամբ և միաժամանակ օրենքի խախտում է:
«Եթե պետական մարմինը կամ տեղական ինքնակառավարման մարմինն արձագանքեն լատինատառ, ռուսատառ, խառնատառ հայերեն գրառումներին, դա օրենքի խախտում է և ենթադրվում է պատասխանատվություն վարչական իրավախախտումների վերաբերյալ օրենսգրքի համաձայն: Գործավարությունը Հայաստանում հայերենն է, իսկ հայերենը ենթադրում է հայատառ գրություն»,-շեշտեց նա:
Լեզվի կոմիտեի նախագահի հավաստիացմամբ՝ եթե անգամ պատասխանատվության հանգամանքը չլիներ, անպատկերացնելի է, որ 21-րդ դար հասած պետականություն ունեցող մեր ազգի ներկայացուցիչներն այսպես են վարվում հայոց լեզվի հետ: Նա հիշեցրեց, որ հիմա հայատառ գրելու բոլոր տեխնիկական միջոցները կան:
English
Русский
