SHAMSHYAN.com-ի տեղեկություններով՝ Հայաստանի քննչական կոմիտեի Երևան քաղաքի քննչական վարչության ճանապարհատրանսպորտային հանցագործությունների քննության բաժնում պարզվել է սեպտեմբերի 1-ին Երևանում Սասնա Ծռեր փողոցից դեպի Վաղարշյան փողոց տանող Դավիթաշենի կամրջի սկզբնամասում վթարի ենթարկված ավտոմեքենաների վարորդների և վիրավորների ինքնությունը։ Ինչպես հայտնում է ֆոտոլրագրող Գագիկ Շամշյանը, պարզվել է՝ Mercedes G-ին վարել է Երևանի բնակիչ Արտավազդ Քյասինյանը, Toyota-ն վարել է Երևանի բնակիչ Գարիկ Սուքիասյանը, Kia-ն վարել է Կամո Ղուկասյանը, իսկ Opel-ը՝ Արայիկ Համբարձումյանը։
Վթարի հետևանքով վարորդներից Գ․ Սուքիասյանն ու Կ․ Ղուկասյանը տեղափոխվել են «Արմենիա» բժշկական կենտրոն։ Իսկ 2 երեխաները տեղում բուժօգնություն են ստացել բժիշկների կողմից, ովքեր նրանց տեղափոխել են հիվանդանոց, սակայն ծնողները հրաժարվել են հիվանդանոցում մնալուց, ասելով, որ իրենք չեն տուժել։
Ինչպես ավելի վաղ դեպքի վայրից հայտնել էր ֆոտոլրագրողը, սեպտեմբերի 1-ին խոշոր ու շղթայական ավտովթար էր տեղի ունեցել Երևանում։ Ժամը 08։00-ի սահմաններում Դավիթաշենի կամրջի սկզբնամասում բախվել էին Mercedes G, Kia Sorento, Toyota Corolla, Opel մակնիշի ավտոմեքենաները։