Առեղծվածային դեպք Արարատի մարզում․ Ուրցաձոր գյուղի տներից մեկի ջրհորում հայտաբերվել է կնոջ դի

Այսօր՝ օգոստոսի 18-ին, առեղծվածային դեպք է տեղի ունեցել Արարատի մարզում։ Ժամը 10։30-ի սահմաններում ՀՀ Ներքին գործերի նախարարության Ոստիկանության Արարատի բաժին ահազանգ է ստացվել, որ Ուրցաձոր բնակավայրի Թումանյան փողոցի տներից մեկի ջրհորում դի կա։

Ինչպես դեպքի վայրից հայտնում է ֆոտոլրագրող Գագիկ Շամշյանը, օպերատիվորեն ժամանել են ՀՀ ՆԳՆ Ոստիկանության Արարատի մարզային վարչության պետ Սարիբեկ Ռուստամյանը, վարչության պետի օպերատիվ գծով տեղակալ Արմեն Նավասարդյանը։

Հաշվի առնելով դեպքի հնչեղության աստիճանը՝ դեպքի վայր է ժամանել Արարատի մարզի դատախազ Վարդան Պողոսյանը։

Ահազանգով ժամանել են նաև ՀՀ ՆԳՆ Ոստիկանության Արարատի բաժնի օպերատիվ խումբը՝ բաժնի պետ Ֆիլիպպ Ստեփանյանի գլխավորությամբ։ 

Ոստիկաններն ու քննիչները ջրատարում հայտնաբերել են կնոջ դի և այն դուրս բերելու համար դեպքի վայր են ժամանել ՀՀ ՆԳՆ Փրկարար ծառայության Վեդիի թիվ 26 հրշեջ-փրկարարական ջոկատի հրշեջ-փրկարարները, ովքեր ճոպանի միջոցով ջրատարից դուրս են բերել կնոջ դին։

Դատաբժշկի նախնական եզրակացության համաձայն՝ արտաքին զննությամբ դիակի վրա բռնության հետքեր չեն հայտնաբերվել։

Դեպքի փաստով Վեդիի քննչական բաժնում սպանություն հատկանիշներով նախաձեռնվել է քրեական վարույթ։

Քննիչի որոշմամբ նշանակվել է դիակի դատաբժշկական փորձաքննություն։

Ոստիկանությունն ու քննչական բաժինը պարզել են, որ մահացածը նույն տան բնակիչ, 52-ամյա Հասմիկ Տ․-ն է։